ӨРГӨДӨЛ Монгол Улсын Үндсэн хуулийн ардчилсан зарчим, иргэдийн засаглалд оролцох эрхийг хангах үүднээс нийслэлийн Засаг даргыг буюу “Хотын дарга”-ыг нийслэлийн иргэдийн шууд сонгуулиар сонгодог тогтолцоог хуульчилж, хэрэгжүүлэхийг Монгол Улсын Их Хуралд санал болгож байна. Одоогийн мөрдөгдөж буй тогтолцоо нь Засгийн газрын санал, Ерөнхий сайдын танилцуулга, Ерөнхийлөгчийн зөвшөөрөл зэргээс шалтгаалж удаашралтай, ил тод бус процесс болж хувирсан. Энэ нь нийслэлчүүдийн итгэл буурахад хүргэж, хотын удирдлага тогтворгүй байх нөхцөлийг үүсгэж байна. Иймд дараах гол зорилтыг хангах хууль эрх зүйн орчныг бүрдүүлж өгөхийг хүсье: 1. Нийслэлийн Засаг даргыг нийслэлийн иргэдийн шууд санал хураалтаар сонгодог байх. 2. Сонгогдсон дарга нь нийслэлийн иргэдийн өмнө тайлагнах, бодлогоо хэрэгжүүлэх бүрэн эрхтэй байх. 3. Иргэдийн төлөөллийн зарчмыг бэхжүүлж, хотын хөгжлийн бодлого тасралтгүй, тогтвортой явагдах нөхцөлийг бүрдүүлэх. Дээр дурдсан үндэслэл, шаардлагын хүрээнд Монгол Улсын Их Хурал “Нийслэлийн удирдлагын тухай хууль”-д өөрчлөлт оруулж, нийслэлийн Засаг даргыг иргэдийн шууд сонгуулиар сонгодог байхаар тусгахыг хүсье.